Nos dous cursos de formación, os alumnos/as van adquirir a través dos diferentes módulos coñecementos relacionados con: os coidados e preparación que requiren os cabalos para a súa equitación e realización de roteiros ecuestres (Técnicas de equitación e Guía ecuestre); o mantemento e uso da bicicleta para guiar a usuarios por roteiros na natureza ou semiurbanos (Guía en bicicleta e Organización de itinerarios); técnicas básicas para a iniciación na práctica de escalada e roteiros por baixa e media montaña (Manobras con cordas e Guía de baixa e media montaña); aprendizaxe de actividades no medio acuático garantindo a seguridade dos usuarios-bañistas en espazos acuáticos naturais (Técnicas de natación, Socorrismo no medio acuático natural e Guía no medio natural) e os recursos necesarios para empatizar con todo tipo de usuarios propiciando así, que os servizos ofrecidos sexan de calidade á vez que motivantes (Técnicas de tempo libre e Atención a grupos).
Como en todos os ciclos formativos, os contidos dos módulos son tratados transversalmente co fin de dotar ao alumno dun coñecemento integral, que lle permita actuar, acorde ao perfil do usuario, nas diversas situacións que o medio natural e o tempo libre ofrece.