Cada día estamos máis preto do inicio das PAU, a proba que para moitos definirá os vosos vindeiros anos. Seguro que estades tensos, cada día máis nerviosos. Deixádeme dicirvos que é totalmente normal. É a primeira vez que vos enfrontades a unha proba así e en ocasións podedes sentir que non sabedes como abordala. Para iso, déixovos unha breve guía de consellos e pasos a seguir para preparar esta proba coa maior tranquilidade e organización posibles. Agardo que vos sexa útil!
1 – CALENDARIO DE ESTUDO.
Cando nos enfrontamos á preparación de probas deste estilo é fundamental a organización do noso tempo. Estades afeitos a ter entregas, deberes, exames parciais… que vos marcan os ritmos, pero agora, atopádesvos sós con moitos días por diante e cero planificación. Por iso, o primeiro que debedes facer é crear o voso calendario de estudo. Debedes ter en conta:
- Canto tempo tedes.
- Canto contido debedes estudar.
- Que materias levades menos preparadas ou vos custan máis.
Unha vez que o teñades claro, podedes comezar a organizalo no voso calendario. Debe ser algo moi concreto. É dicir, non poñemos que imos estudar Lingua Castelá, senón que imos ler e subliñar o Tema 3 de Lingua Castelá e repasar o Tema 4 de Bioloxía.
Ollo! O noso calendario de estudo pode xogarnos unha mala pasada se non o usamos ben. Por iso, recoméndovos:
- Ser realistas no momento de facelo, xa que debemos tratar de cumprilo. Non poñades 10 horas de estudo ao día. Ninguén vos coñece mellor ca vós mesmos. Tede en conta os vosos ritmos e cando adoitades estar máis cansos (pola mañá, as fins de semana, cara á última hora do día…)
- Non vos obsesionedes. Haberá días que vos custe máis seguir o planning, e NON PASA NADA, sempre e cando non sexa o habitual. Hai mil factores que poden alterar o noso estudo. Se un día sentes que estás moi canso e non estás aproveitando o tempo, é mellor que pares e descanses. O teu cerebro agradeceracho.
2 – ESTUDO ACTIVO E DINÁMICO.
Vas pasar moitas horas estudando, polo que, canto máis dinámico sexa, mellor. Para iso, déixoche algúns consellos:
- Crea contido: cando escribimos, xa sexan mapas conceptuais, esquemas, resumos, flashcards… o noso cerebro actívase e retén con maior facilidade os contidos. Non te limites a ler e subliñar.
- Usa os exames anteriores: usar exames de anos previos é perfecto para afacerse ao modelo (aínda que cambiase en 2025), observar o progreso, repasar de forma activa e detectar temas recorrentes nos exames.
- Convértete en profesor: un método tanto de repaso como de estudo super activo é dicir o contido en voz alta. Ademais de ser máis entretido e ameno, axuda en moitos aspectos: favorece a comprensión (non chapar), mellora a capacidade de explicar (fundamental en exames de desenvolvemento e comentarios de texto), activa o cerebro, xa que usas a linguaxe, a audición, a memoria…
- Descansos activos: nada de coller o móbil segundo paramos de estudar. Sae da túa zona de traballo, bebe un pouco de auga, móvete, fala con alguén, toma o aire… aínda que sexa por cinco minutos. Un estudo activo debe ir acompañado dun descanso activo.
3 – REPASOS.
Os repasos son fundamentais en calquera rutina de estudo, pero cando falamos da preparación de exames a máis longo prazo, son fundamentais. Aínda así, é importante saber facelo para que realmente nos sexan útiles.
Sabías que hai unha relación entre as veces que repetimos un contido no tempo e a súa eficacia?
Para que o repasado pase á memoria a longo prazo (a que nos interesa neste caso) debemos facer entre 4 e 5 repasos do temario. Ademais, o repaso espazado no tempo é o que mellor funciona. O máis recomendable é espazalo da seguinte maneira:
- Primeiro repaso: ao día seguinte
- Segundo repaso: 3 días despois.
- Terceiro repaso: á semana de telo estudado.
- Cuarto repaso e posteriores: os días previos.
Ollo! Non é recomendable repasar a fondo o día do exame nin o día anterior. Sei que soa contraditorio e mesmo pode asustar, pero facer isto pode saturar o cerebro e xerar inseguridade de cara ao exame. Iso non quita que poidas ler unha última vez as ideas principais ou repasar fórmulas clave antes do exame, pero non facer un repaso profundo.
4 – CONTROL DO ESTRÉS.
Pode parecer doado dicirvos que debedes controlar o voso estrés durante esta época, pero é fundamental. A ansiedade, o nerviosismo e o estrés poden xogarnos unha mala pasada, así que debemos tratar de evitalo. É habitual que caiades en malos hábitos como non saír da casa, dedicar demasiadas horas de estudo, non descansar o suficiente… e todo isto irá na vosa contra.
Déixovos, xa para rematar, algúns consellos para que poidades estar o máis tranquilos posibles e render ao máximo:
- Manter unha dieta equilibrada e unha boa hidratación.
- Non quedar confinados na casa. Aproveita os ratos libres para saír á rúa, dar un paseo… tamén é importante socializar e pasar tempo cos teus amigos e familia.
- Dedícalle tempo a descansar. O estudo debe ir acompañado sempre de descanso. Durme polo menos 8 horas ao día e tómate descansos entre sesións de estudo, sempre activos.
- Non esquezas facer deporte, aínda que sexa durante 30 minutos ao día.
- Confía en ti. Só estás repasando o que viches durante todo o curso.
E con isto, e moita constancia, deberiades poder sobrevivir á preparación da PAU. Aínda así, e como último consello, quero lembrarvos que a vida non remata na PAU. Ás veces as cousas non saen como agardabamos, pero haberá outras oportunidades. Ademais, como xa dixen, se fuches constante durante o curso, isto será un pequeno repaso do curso.
Moita sorte a todos!
