No Plan Lector está implicado todo o profesorado do Colexio Diocesano San Lorenzo, pois todos somos conscientes da necesidade de traballar na lectura, expresión e produción de textos.
De maneira particular, o equipo responsable do plan lector, integrado polos docentes da área lingüística do Centro, encárgase do labor de promoción e dinamización deste plan. Este equipo proporciona os materiais, espazos e ferramentas que o resto dos profesores precisen para a promoción da lectura nas súas materias.
Os obxectivos do Plan Lector que baixo o lema “Vós sodes a Luz” vai levar a cabo neste curso son sinxelos e moi concretos:
- Fomentar o interese pola lectura facilitando o acceso a un amplo catálogo de lecturas adaptadas a cada etapa nun espazo de lectura específico e moi atraente para que sentan a gusto mentres len.
- Traballar a comprensión lectora, para o que contamos cun banco de actividades idóneas para todos os niveis e calquera modalidade textual.
- Mellorar a produción escrita mediante propostas semanais orixinais e motivadoras.
Para alcanzar estes obxectivos, o Plan Lector vaise percibir na vida cotiá do centro mediante tres niveis de actuación:
- Desde a área de linguas vaise realizar unha actividade semanal baixo un fío condutor suxestivo co que se traballará en todos os cursos.
- O resto das materias dedicará unha clase ao mes a actividades relacionadas coa lectura.
- Unha vez ao trimestre todo o alumnado participará nunha actividade relacionada co plan lector.
As actividades previstas son moi diversas e pensadas para todos os cursos:
- Lecturas guiadas e individuais.
- Actividades de comprensión lectora.
- Tradución de textos.
- Produción de textos de distintas modalidades.
- Literatura e cinema.
- Charlas con escritores.
- Blogue do plan lector.
- Roteiros guiados pola cidade relacionadas coa lectura.
